დღეს ბათუმის საქალაქო სასამართლოში თექვსმეტი წლის ასაკს მიუღწეველთან სექსუალური კავშირის დამყარებისა და თვითმკვლელობამდე მიყვანის ბრალდებით დაბადებულის სასამართლო პროცესი გაიმართა.
გახმაურებული საქმე დახურულ ფორმატში ჩატარდა, რადგან საქმე არასრულწლოვანს ეხება. ბათუმის საქალაქო სასამართლოს მოსამართლე დავით მამისეიშვილმა ბრალდებულს აღკვეთი ღონისძიების სახით პატიმრობა შეუფარდა.
„ჩვენ არ ვეთანხმებით სასამართლოს მიერ მიღებულ გადაწყვეტილებას და მას აუცილებლად გავასაჩივრებთ. არა მხოლოდ სააპელაციო სასამართლოში, არამედ ადამიანის უფლებათა ევროპულ სასამართლოში.
არ არსებობდა პატიმრობის გამოყენების არანაირი, არც ფაქტობრივი და არც ფორმალური საფუძველი. რაც შეეხება მიმალვის საფრთხეს, როცა გამოძიება დაიწყო ჩემი დაცვის ქვეშ მყოფი თანამშრომლობდა საგამოძიებო ორგანოებთან. როცა ბავშვი გარდაიცვალა, მისი დაკავება მოხდა სახლში, არსად არ იმალებოდა.
ჩემი დაცვის ქვეშ მყოფი მტკიცებულებებს ვერ გაანადგურებდა, როცა ჩემი დაცვის ქვეშ მყოფი და მისი ოჯახის წევრები ნებაყოფლობით აძლევდნენ მტკიცებულებებს გამოძიებას. ვერც ზეწოლას მოახდენდა მოწმეებზე. მიგვაჩნია, რომ სასამართლოს გადაწყვეტილება არ არის დასაბუთებული და გავასაჩივრებთ“,- განაცხადა ადვოკატმა ირაკლი შავაძემ.
შეგახსენებთ, ქობულეთის მუნიციპალიტეტის სოფელ ქაქუთში 9 თებერვალს 14 წლის მოზარდმა თავი მოიკლა.
10 თებერვალს პოლიციამ ნ. ტ. დააკავა. მას ბრალი საქართველოს სისხლის სამართლის კოდექსის 140-ე მუხლის პირველი ნაწილითა და 115-ე მუხლით წარედგინა. ბრალის დამტკიცების შემთხვევაში ბრალდებულს 7-დან 9 წლამდე თავისუფლების აღკვეთა ემუქრება.
ავტორი: ნაირა ქობულაძე
