| რეინფიცირების შემთხვევების სტატისტიკა მსოფლიოში

Washington post-ის ინფორმაციით, 16 ოქტომბრის მონაცემებით, მსოფლიოში რეინფიცირების 24 შემთხვევა ფიქსირდება.

რეინფიცირების პირველი შემთხვევა აგვისტოში დაფიქსირდა, როდესაც 33 წლის ჰონგ-კონგელი მამაკაცი გამოჯანმრთელებიდან 4 თვეში კვლავ ინფიცირდა.

ადამიანი რეინფიცირებულად ითვლება მაშინ, თუ გამოკვლევის შედეგად დადგინდება, რომ მისი ინფიცირება პირველ და მეორე ჯერზე SARS-CoV-2-ის განსხვავებული შტამით მოხდა.

| როგორ იცავს თავს ადამიანის იმუნური სისტემა ვირუსული ინფექციებისგან და რა ხდება COVID-19-ის შემთხვევაში

იმუნიტეტი – ეს არის იმ უჯრედების ერთობლიობა, რომლის ძირითადი ფუნქციაც ორგანიზმის ინფექციებისგან დაცვაა.

კერძოდ, ადამიანის იმუნური სისტემა, ორგანიზმში შეღწეული დაავადებების გამომწვევ მიკრობებს, ანტიგენებს „უცხო სხეულებად“ აღიქვამს და მათ წინააღმდეგ საბრძოლველად ცილოვანი ნივთიერებების – ანტისხეულების გამომუშავებას იწყებს.

არსებობს თანდაყოლილი და შეძენელი იმუნიტეტი, რომელსაც ადამიანები ამა თუ იმ კონკრეტული ინფექციის გადატანის შედეგად იმუშავებენ.

ჩატარებული კვლევების მიხედვით, ორგანიზმს კორონავირუსის წინააღმდეგ ანტისხეულების გამომუშავებისა და იმუნური რეაქციის გამომუშავებისთვის 10 დღე სჭირდება.

|რამდენ ხანს რჩება ადამიანის ორგანიზმში კორონავირუსის ანტისხეულები

მკვლევრების თქმით, კორონავირუსით ინფიცირების შემდეგ, ადამიანის ორგანიზმში დამცავი ანტისხეულების დონე „საკმაოდ სწრაფად“ იკლებს.

The Imperial College London-ის მიერ ჩატარებულმა კვლევამ აჩვენა, რომ იმ ადამიანების რაოდენობამ, რომლებსაც სისხლში ინფიცირების შემდეგ ვირუსის ანტისხეულები დაუფიქსირდათ, ივნისი-სექტემბრის შუალედში 26%-ით დაიკლო.

მათი თქმით, ვირუსის მიმართ გამომუშავებული იმუნიტეტი დროთა განმავლობაში ქრება და რეინფიცირების რისკი იქმნება.

კერძოდ, REACT-2 კვლევის ფარგლებში დიდ ბრიტანეთში 350 000-ზე მეტმა ადამიანმა ე.წ. ანტისხეულების ტესტი გაიკეთა.

კვლევის პირველ ეტაპზე (ივნისის ბოლოსა და ივლისის დასაწყისში) 1 000 ადამიანიდან 60-ს ორგანიზმში ვირუსის ანტისხეულები დაუფიქსირდა.

სექტემბერში ჩატარებულმა ტესტებმა კი აჩვენა, რომ 1 000 ადამიანიდან ანტისხეულები მხოლოდ 44-ს აღენიშნებოდა.

„იმუნიტეტი საკმაოდ სწრაფად იკლებს. ჩატარებულმა კვლევამ აჩვენა, რომ 3 თვეში იმ ადამიანების რაოდენობა, რომლებსაც სისხლში ინფიცირების შემდეგ ვირუსის ანტისხეულები დაუფიქსირდათ, ივნისი-სექტემბრის შუალედში 26%-ით შემცირდა“, – აღნიშნავს პროფესორი ჰელენ ვარდი.

ანტისხეულების დონემ 65 წელს გადაცილებულ ადამიანებში უფრო სწრაფად იკლო, ვიდრე ახალგაზრდებში.

აღსანიშნავია, რომ სამედიცინო პერსონალის შემთხვევაში, ანტისხეულების დონე ორგანიზმში შედარებით მაღალი დარჩა. მკვლევართა აზრით, მსგავსი შედეგი, შესაძლოა, ვირუსთან „მუდმივი კონტაქტით“ იყოს გამოწვეული.

|ახალი კორონავირუსის იმუნიტეტს მხოლოდ ანტისხეულები აყალიბებს?

არა.

იმუნოლოგ-ალერგოლოგ, ბიძინა კულუმბეგოვის განცხადებით, ინფექციის წინააღმდეგ ბრძოლაში  T-ლიმფოციტებიც მონაწილეობენ.

„ადამიანის ორგანიზმში ნებისმიერი უცხო აგენტის შეჭრისას, ორგანიზმი ორი ტიპის იმუნიტეტს ავითარებს: ერთია ანტისხეულები – ესაა მობილური „დესანტი“, „ჯარისკაცები“ და ამას ებრძვის მეორე „ბატალიონიც“, T-ლიმფოციტების.

ამას ჰქვია უჯრედული იმუნიტეტი, რომლებიც მყარად არიან, ანუ, ასე ვთქვათ, არ მოძრაობენ. შეიძლება, ინფექცია გადავიტანო და ეს ანტისხეულები არ მესაზღვრებოდეს ან ძალიან დაბალი მქონდეს, ვთქვათ, 2,3,4 თვეში დამეკარგოს, მაგრამ ეს არ ნიშნავს, რომ T-ლიმფოციტური იმუნიტეტი არ მაქვს“,- აცხადებს კულუმბეგოვი.

|როდის უფრო რთულად გადააქვს ადამიანს ვირუსი – პირველად თუ რეინფიცირების დროს

ფაქტები

• 13 ოქტომბერს აშშ-ში კორონავირუსით რეინფიცირების პირველი შემთხვევა დაფიქსირდა. 25 წლის მამაკაცს კოვიდინფექცია პირველად აპრილში დაუდასტურდა. 26 მაისს კორონავირუსის ტესტზე პასუხი უარყოფითი იყო. თუმცა, თვე-ნახევრის შემდეგ მამაკაცი კორონავირუსით ხელახლა, გაცილებით რთული ფორმით ინფიცირდა.
• 14 ოქტომბერს რეინფიცირების შედეგად, ნიდერლანდებში 89 წლის ქალი გარდაიცვალა.
• Washington post-ის ინფორმაციით, რეინფიცირების შემდეგ ადამიანების გარკვეული რაოდენობა თავს უფრო ცუდად გრძნოდა.

მეცნიერები

მეცნიერების ნაწილი ამბობს, რომ მომავალში  ადამიანები კორონავირუსით მეორედ ინფიცირებას უფრო მარტივად გადაიტანენ.

კერძოდ, მათი თქმით, იმ ადამიანებსაც კი შეიძლება ჰქონდეთ კორონავირუსის მიმართ გარკვეული იმუნიტეტი, რომლებსაც სისხლში კორონავირუსის ანტისხულები არ უფიქსირდებათ.

როგორც მეცნიერები განმარტავენ, პირველი ინფიცირების შემდეგ ორგანიზმის მიერ გამოწვეულმა მძლავრმა იმუნურმა რეაქციამ, შესაძლოა, ორგანიზმში ე.წ. „იმუნური მეხსიერება“ შექმნას.

ანუ, უჯრედებს შეიძლება ახსოვდეთ, როგორ გაუმკლავდნენ ანტიგენებს პირველი ინფიცირების დროს.

თუმცა, აღსანიშნავია ისიც, რომ კორონავირუსი 10 თვისაა და მასზე მეცნიერებმა ჯერ კიდევ ბევრი არაფერი იციან. ამიტომ, სიტუაცია მომავალში, შესაძლოა, რადიკალურად შეიცვალოს.

ავტორი: ნინი ტაველიძე, საინფორმაციო სააგენტო PTN.ge