ახალი ამერიკული უსაფრთხოების მკვლევარის, რეიჩელ რიზოს განცხადებით, რუსეთს არა აქვს იმის გადაწყვეტის უფლება, თუ ვინ შეუერთდება NATO-ს და ამის უფლება არც არასდროს ექნება. ამის შესახებ მან ამერიკის ხმასთან ინტერვიუში ისაუბრა და ასე უპასუხა ჟურნალისტის კითხვას, რამდენად ძლიერია რუსული ფაქტორი NATO-ს საკითხზე.
“ვფიქრობ ეს თემა, სულ უფრო დიდ ყურადღებას იქცევს ბოლო დროს. უკრაინის საგარეო საქმეთა მინისტრმა, კულებამ თქვა, რომ NATO-ში არიან ქვეყნები, რომლებიც დღემდე იმ ლოგიკით ხელმძღვანელობენ, რომ რუსეთი არ უნდა გააღიზიანონ, იმ კუთხით, უნდა იყვნენ თუ არა საქართველო და უკრაინა ალიანსის წევრები.
თუმცა, ვფიქრობ, რომ ცოტა ხნის წინ, სახელმწიფო მდივან ბლინკენის ვიზიტი უკრაინაში და პრეზიდენტ ზელენსკისთან შეხვედრა, რეგიონში ამერიკის ვალდებულებების და ერთგულების ჩვენების ნიშანია. მან თქვა, რომ ამერიკა აქტიურად განიხილავს უსაფრთხოების მიმართულებით თანამშრომლობისა და უსაფრთხოებაში დახმარების საკითხებს, ასე რომ ეს ყველაფერი ძალიან კარგი ნიშანია”, – განაცხადა რეიჩელ რიზომ.
მისი განცხადებით, საქართველოსა და უკრაინისთვის დემოკრატიული რეფორმების გატარება და იმ საკითხებზე მუშაობის გაგრძელება, რომელიც ხელს უშლის ამ რეფორმებს, არის გზა NATO-სკენ. რიზოს თქმით, როგორც NATO-ს გენერალურმა მდივანმა თქვა, NATO-ს კარი ღიად რჩება.
