საბერძნეთმა თურქეთთან საზღვარზე 40-კილომეტრიანი კედლის მშენებლობა დაასრულა. ამის შესახებ ადგილობრივი გამოცემა Ekathimerini წერს.
ათენის განცხადებით, საზღვარზე ვიდეოკონტროლის ახალი სისტემა დამონტაჟდა, რათა ავღანეთში ხელისუფლებაში „თალიბანის“ მოსვლის შემდეგ თავშესაფრის მაძიებელთა ახალი ტალღა ევროპაში არ მოხვდეს.
ავღანეთში განვითარებულმა მოვლენებმა ევროკავშირში გააჩინა შიში იმისა, რომ განმეორდება 2015 წლის კრიზისი, როდესაც ახლო აღმოსავლეთში ომის გამო დაახლოებით მილიონი ადამიანი თურქეთიდან საბერძნეთში გადავიდა, შემდეგ კი ევროპის სხვადასხვა ქვეყანაში აღმოჩნდა.
„ავღანეთში შექმნილმა კრიზისმა მიგრანტების ახალი ნაკადის წარმოშობისთვის საფუძველი შექმნა. ჩვენ ვერ დაველოდებით იმას, როდის მოაწყდებიან მიგრანტები საბერძნეთის საზღვრებს“, – განაცხადა საბერძნეთის სამოქალაქო დაცვის მინისტრმა, მიხალის ქრისოქოიდისმა.
