„ევროპული საქართველო“ საკონსტიტუციო ცვლილებების მეორე მოსმენას ბოიკოტს უცხადებს. როგორც „პრაიმტაიმთან“ სერგო რატიანმა განაცხადა, ვიდრე „მთავარი არხის“ ერთ-ერთი დამფუძნებელი საპატიმროდან არ გათავისუფლდება, „ევროპული საქართველო“ საკონსტიტუციო ცვლილებების განხილვაში მონაწილეობას არ მიიღებს.
„ჩვენ სრულიად ცხადად ვთქვით, იმ შემთხვევაში, თუ რურუა არ იქნება გათავისუფლებული, მეორე მოსმენაზე ჩვენ არ შევალთ.
იმ შემთხვევაში, თუ ხელისუფლება მოინდომებს გაიმეოროს ნოემბრის სცენარი, მაშინ მთელი პასუხისმგებლობა მათზე იქნება და ესეც საკმაოდ მძიმე შედეგებს გამოიღებს.
როგორც ვნახეთ, 113 ხმა არის საკონსტიტუციო ცვლილებების განხორციელებისთვის საჭირო. წინაზე იყო 136, ესიგი 116 ხმა მმართველ პარტიას ჰქონდა, ამიტომ პასუხისმგებლობა მთლიანად „ქართულ ოცნებზეა“,- განაცხადა სერგო რატიანმა.
ინფორმაციისთვის, საკონსტიტუციო ცვლილებების პირველ მოსმენას „ევროპული საქართველო“ დაესწრო, ხოლო „ნაციონალურმა მოძრაობამ“ მონაწილეობაზე უარი განაცხადა, ეს უკანასკნელი არც ხვალინდელ სესიაში მიიღებს მონაწილეობას.
პარლამენტი საკონსტიტუციო ცვლილებებს მეორე მოსმენით კენჭს ხვალ უყრის.
ავტორი: ეკატერინე ზარნაძე
