საქართველოს საპატრიარქო თურქეთს მოუწოდებს აია სოფია ნეიტრალურ სივრცედ დატოვოს. ამის შესახებ საპატრიარქო სპეციალურ განცხადებას ავრცელებს.
„საქართველოს მართლმადიდებელი ეკლესია თვალყურს ადევნებს გავრცელებულ ინფორმაციას იმის შესახებ, რომ აია-სოფიას, რომელიც აშენდა როგორც გამორჩეული ქრისტიანული ტაძარი და ამ სახით ფუნქციონირებდა თითქმის 1000 წლის მანძილზე, შესაძლოა, სტატუსი შეეცვალოს.
ცნობილია ისიც, რომ თურქეთის მხარის ეს განაცხადი გარკვეულმა მიზეზებმა განაპირობა, თუმცა, ახლა, როდესაც კაცობრიობა არაერთი გლობალური გამოწვევის წინაშე დგას, ძალიან დიდი მნიშვნელობა აქვს ქრისტიანებსა და მუსლიმებს შორის კეთილგანწყობის შენარჩუნებასა და განმტკიცებას; ვფიქრობთ, დღეს ბრძნული ნაბიჯი იქნება, თუ აია-სოფია კვლავაც ნეიტრალურ სივრცედ დარჩება.
პატივს ვცემთ რა თურქეთის რესპუბლიკის სუვერენიტეტს, ვიმედოვნებთ, რომ ეს დამოკიდებულება მეგობარი სახელმწიფოს მიერ აღქმული იქნება არა როგორც მის შიდა საქმეებში ჩარევად, არამედ ჩვენი, როგორც ერთ-ერთი უძველესი მართლმადიდებელი ეკლესიის, მოსაზრებად და გულისტკივილის გამოხატულებად.
იმედი გვაქვს, თურქეთსა და საქართველოს შორის არსებული კეთილმეზობლური, მეგობრული და სტრატეგიული ურთიერთობები კვლავაც გაღრმავდება, რაც ფრიად სასიკეთო იქნება ორივე ქვეყნისათვის“,- ნათქვამია გავრცელებულ განცხადებაში.
შეგახსენებთ, მარტში ერდოღანმა განაცხადა, რომ აია-სოფიასთვის მუზეუმის სტატუსის მინიჭება „დიდი შეცდომა“ იყო.
აია სოფიას მეჩეთად გადაკეთების ინიციატივას აშშ-ის სახელმწიფო მდივანი, მაიკ პომპეო გამოეხმაურა. მისი განცხადებით, სტამბოლში წმინდა სოფიას ტაძარი მეჩეთად არ უნდა გადაკეთდეს.
მაიკ პომპეოს ეს განცხადება თურქეთის საგარეო საქმეთა სამინისტრომ გააკრიტიკა. მათი თქმით, ნებისმიერი საკითხი, რომელიც აია-სოფიას ეხება, „თურქეთის შიდა საქმეს წარმოადგენს“.
აია სოფიას სტატუსზე თურქეთის სასამართლოს გადაწყვეტილება 17 ივლისს გამოქვეყნდება.
