აზერბაიჯანი და სომხეთი საზღვარზე მომხდარ შეიარაღებული დაპირისპირებაში ერთმანეთს ადანაშაულებენ.
აზერბაიჯანის თავდაცვის სამინისტროს განცხადებით, საბრძოლო მოქმედებები სომხეთმა, სტრატეგიული პოზიციის დაკავების მიზნით, დაიწყო.
„სომხეთის შეიარაღებულმა ძალებმა, საარტილერიო საშუალებების გამოყენებით, განახორციელეს შეტევა აზერბაიჯან-სომხეთის სახელმწიფო საზღვარზე, რათა დაეკავებინათ ჩვენი პოზიციები ტოვუზის მიმართულებით. ჩვენი ქვედანაყოფების მიერ გადადგმული ადეკვატური ნაბიჯების შედეგად, მტერი დამარცხდა და იძულებული გახდა უკან დაეხია“,- ნათქვამია აზერბაიჯანის თავდაცვის სამინისტროს განცხადებაში.
სომხეთი თავის მხრივ, 12 ივლისს მომხდარ დაპირისპირებაზე პასუხისმგებლობას აზერბაიჯანს აკისრებს.
„დღეს, დაახლოებით 12:30 საათზე, აზერბაიჯანის შეირაღებული ძალების სამხედროებმა, ჩვენთვის გაუგებარი მიზეზით, УАЗ-ის ტიპის ავტომობილით, სცადეს სომხეთის სახელმწიფო საზღვრის დარღვევა ტოვუზის მიმართულებით. სომხური მხარის გაფრთხილების შემდეგ, სამხედროებმა ავტომობილი დატოვეს და საკუთარ პოზიციებზე დაბრუნდნენ. 13:45 საათზე აზერბაიჯანელმა სამხედროებმა, საარტილერიო ცეცხლის გამოყენებით სცადეს ჩვენი პუნქტის ხელში ჩაგდება, თუმცა უკუგდებული იყვნენ საპასუხო ცეცხლით“, – წერს სოციალურ ქსელში სომხეთის თავდაცვის სამინისტროს პრესსპიკერი შუშან სტეპანიანი.
ცნობისთვის, 12 ივლისს აზერბაიჯანი-სომხეთის საზღვარზე სომეხ და აზერბაიჯანელ სამხედროებს შორის დაპირისპირება მოხდა.
შეგახსენებთ, რომ ბაქოს და ერევანს წლებია კონფლიქტი აქვთ აზერბაიჯანის საერთაშორისოდ აღიარებული რეგიონის, მთიანი ყარაბაღის გარშემო. სომხეთის მიერ მხარდაჭერილმა სეპარატისტებმა აზერბაიჯანის ეს, ძირითადად სომხებით დასახლებული რეგიონი ადრეული 1990-იანი წლების ომით მოიპოვეს. ომს 30,000-მდე ადამიანი შეეწირა. კონფლიქტის გადაჭრის დიპლომატიურ მცდელობებს მნიშვნელოვანი პროგრესი არ მოჰყოლია.
