“ჩვენ არასოდეს გვითქვამს, რომ დროებით საგამოძიებო კომისიაში ჩართვაზე პრინციპულად უარს ვაცხადებთ. ჩვენ ვამბობთ, რომ მუშაობაში მონაწილეობას მივიღებთ, თუ ამ ფორმატში ის პარტიები ჩაერთვებიან, რომელთაც 3800 საარჩევნო უბანზე საკუთარი დამკვირვებელი ჰყავდათ და, როგორც თავად აცხადებენ, გაყალბების მტკიცებულებები აქვთ”, – ამის შესახებ „მოქალაქეების“ ლიდერმა, ლევან იოსელიანმა განაცხადა.

“მათთან ერთად მზად ვართ, მუშაობაში მონაწილეობა მივიღოთ. ცალკე მონაწილეობის აზრს ვერ ვხედავ, რადგან მხოლოდ 30 უბანზე გვყავდა დამკვირვებლები. მთლიანი სურათისთვის საჭირო იქნება იმ პარტიების მონაწილეობა, ვინც მთელ საქართველოში იყო წარმოდგენილი. კარგია, რომ კვოტები ღიაა და თუ პარტიები პარლამენტში შემოვლენ, კომისიას სიამოვნებით შევუერთდებით.

თუ პოლიტიკური კრიზისის განმუხტვა გვინდა, ყველამ ნაბიჯები უნდა გადავდგათ იმისთვის, რომ ეს კრიზისი განიმუხტოს კონკრეტული მექანიზმებით. კარგი იქნება, თუ პოლიტიკური პარტიები პარლამენტში შემოვლენ და მონაწილეობას მიიღებენ ნებისმიერ ისეთ ფორმატში, სადაც თავიანთი სიმართლის დამტკიცებას შეძლებენ. მათ ამაში მხოლოდ დავეხმარები“, – აცხადებს იოსელიანი.