იქნება თუ არა „ნაციონალური მოძრაობის“ პრემიერ-მინისტრობის კანდიდატი საქართველოს ყოფილი პრეზიდენტი მიხეილ სააკაშვილი, პარტიას გადაწყვეტილება არ მიუღია.
როგორც „ნაცმოძრაობის“ პოლიტსაბჭოს ერთ-ერთმა წევრმა გიორგი ბარამიძემ “პრაიმტაიმნიუსთან” საუბრისას განაცხადა, მისი პარტია ამ საკითხზე სააკაშვილის მოსაზრების დაფიქსირებას ელოდება.
„პარტიამ პრემიერ-მინისტრის კანდიდატურასთან დაკავშირებით, იმსჯელა. ჩვენ პოზიცია ჩამოყალიბებული გვაქვს, თუმცა ჯერ საბოლოო გადაწყვეტილება მიღებული არ არის. ველოდებით მიხეილ სააკაშვილის მოსაზრებებს და შეხედულებებს. უახლოეს ხანში საზოგადოებას ჩვენს გადაწყვეტილებას ვაცნობებთ“,- განაცხადა ბარამიძემ.
კითხვაზე, დაანონსებული დაბრუნების შემდეგ, როდის ჩამოვა სააკაშვილი საქართველოში, ბარამიძე გვპასუხობს:
„პრეზიდენტ სააკაშვილს ახალი არაფერი უთქვამს. ვიცით, რომ ის ყოველთვის ჩართულია ქართულ პოლიტიკაში. ის აუცილებლად დაბრუნდება საქართვლოში მაშინ, როცა ამის შესაბამისი მომენტი იქნება.
ეს მოხდება იმ მომენტში, როცა ეს ყველაზე მეტად დასჭირდება ჩვენს საზოგადოებას, ოღონდ მოხდება ყოველგვარი შფოთისა და არეულობის გარეშე. მან თვითონ თქვა, რომ ჩვენი ინტერესია, არჩევნები ჩატარდეს მშვიდობიან, წყნარ, ნორმალურ გარემოში, რამდენადაც ეს შესაძლებელია მატყუარა და კრიმინალთან შეკრული რეჟიმის პირობებში“,- განაცხადა მან.
ინფორმაციისთვის, რამდენიმე დღის წინ საქართველოს ყოფილმა პრეზიდენტმა მიხეილ სააკაშვილმა ვიდეომიმართვისას განაცხდა, რომ ის „საქართველოში ბრუნდება“.
