საქართველოში კორონავირუსით ინფიცირებულთა რაოდნეობა ყოველდღიურად რეკორდულად იზრდება. დღეს ვირუსის 578 ახალი შემთხვევა დადასტურდა.
ჯანდაცვის საკითხებში ექსპერტი აკაკი ზოიძე ქვეყანაში არსებულ ეპიდსიტუაციას ეხმაურება. როგორც მან „პრაიმტაიმნიუსთან“ საუბრისას განაცხადა, ქვეყანაში რეგულაციები კი არ უნდა გამკაცრდეს, არამედ მოქალაქეებმა მათ აღსრულებაზე უნდა იზრუნონ.
მისივე თქმით, საქართველოში პირბადეს არასწორად იყენებენ, რამაც ვირუსის აფეთქება გამოიწვია.
„აჭარაში ეპიდაფეთქება დაკავშირებულია იმასთან, რომ რეგულაციების გაკონტროლება შესაბამისად არ მოხდა. დამაიმედებელი ის არის, რომ თბილისსა და სხვა რეგიონებში ინფიცირებულების რაოდენობა ძალიან არ მატულობს.
კრიტიკული მნიშვნელობა აქვს, რომ ადეკვატურად მოხდეს ყოველი ინფიცირებულის კონტაქტის მოძიება, მათი ტესტირება და იზოლირება. თუ ეს კარგად შეძლეს შესაბამისმა სამსახურებმა, მაშინ ჩვენ სიტუაციას გავაკონტროლებთ.
რეგულაციებს გამკაცრება კი არ უნდა, არამედ შესრულება და აღსრულებაზე კონტროლი. მთავარი იარაღი ამ ვირუსთან საბრძოლველად არის დაწესებული რეგულაციების შესრულება, ანუ პირბადის ტარება და დისტანციის დაცვა.
ზაფხულის განმავლობაში მოდის აქსესუარად გადაიქცა პირბადის ტარება, ზოგი ნიკაპზე იკეთებდა, ზოგი შუბზე, ამან ნოყიერი ნიადაგი შექმნა იმისა, რომ ქვეყანაში ვირუსის აფეთქება მომხდარიყო“,- განაცხადა ზოიძემ.
ინფორმაციისთვის, დღეს საქართველოში კორონავირუსის მორიგი რეკორდული რაოდენობა – 578 ახალი შემთხვევა დაფიქსირდა.
