კორონავირუსის შემთხვევების რეკორდულ მატებასთან ერთად, კრიტიკული პაციენტების რაოდენობაც იზრდება, – ამის შესახებ ინფექციონისტი ალექსანდრე გოგინავა აცხადებს.
მისი თქმით, პროცენტულად ახალგაზრდა ასაკში სიკვდილიანობის მაჩვენებელი დაბალია.
„კორონავირუსით სიკვდილიანობა გაახალგაზრდავებული არ არის, უბრალოდ, საქართველოში ახალი შემთხვევების რეკორდული ზრდაა და სამწუხაროდ, იზრდება მძიმე და კრიტიკული პაციენტების რაოდენობა, სადაც გარკვეული წილი მეტ-ნაკლებად, ახალგაზრდა ადამიანებსაც უკავიათ.
ამიტომ, პროცენტულად რომ ავიღოთ, ახალგაზრდა ასაკში სიკვდილიანობა არის ძალიან დაბალი, თუმცა ერთეული შემთხვევები მაინც გვხვდება.
რაც შეეხება მსუბუქი რამდენად შეიძლება დამძიმდეს და ამის რისკები არსებობს თუ არა. რისკები არსებობს, ოღონდ ძალიან დაბალია, რადგან ხშირად, პაციენტები, რომელთანაც დაავადება მიმდინარეობს უსიმპტომოდ, პირველი ერთი კვირის განმავლობაში ასეთი პაციენტების დამძიმება იშვიათია, მაგრამ ერთეული შემთხვევები აქაც შესაძლებელია. ამიტომ, ძალიან მნიშვნელოვანია დინამიკაში დაკვირვება იმ მსუბუქი პაციენტებისა, რომლებიც არ არიან სტაციონარში და იმყოფებიან ბინაზე. ხშირ შემთხვევაში, მათ უნდა ჰქონდეთ და აქვთ ონლაინკონტაქტი ექიმთან, თითოეული სიმპტომის განვითარების დროს უნდა შეატყობინონ ექიმს, რათა დროულად მოხდეს რეაგირება“, – განმარტა გოგინავამ.
