აჭარის მთავრობის სახლთან მიმდინარე გაერთიანებული ოპოზიციის აქციაზე ექვსი პირი დააკავეს, ხოლო ერთი პოლიციელი დაშავდა.
როგორც აჭარის პოლიციის დეპარტამენტის უფროსი კოტე ანანიაშვილი აცხადებს, აქციის მონაწილეებმა პოლიციის კანონიერი მოთხოვნა, დაეტოვებინათ ტერიტორია, არ შეასრულეს, რასაც დაპირისპირება მოჰყვა.
„მათი მიზანი იყო მთავრობის თავმჯდომარე თორნიკე რიჟვაძესთან შეხვედრა. ამან გამოიწვია მათი გაღიზიანება. არ დაემორჩილნენ პოლიციის კანონიერ მოთხოვნებს. ექვსი პირია დაკავებული, ერთი პირი დაემატა. საპატრულო პოლიციის თანამშრომლების მიერ არის დაკავებული.
რაც შეეხება დაშავებულ კონკრეტულ სამართალდამცავს, მისი განმარტებით სავარაუდოდ, მიიღო დაზიანება და ამის გამო შეუძლოდ გახდა და დატოვა მიმდებარე ტერიტორია. სერიოზული დაზიანებები არ აქვს და კლინიკაში არ იმყოფება.
დამატებით შევაფასებთ ფაქტს, კონკრეტულად გავესაუბრებით აღნიშნულ თანამშრომელს და მოხდება შესაბამისი სამართლებრივი შეფასება“, – განაცხადა კოტე ანანიაშვილმა.
დაკავებულები პოლიციის სხვადასხვა განყოფილებაში არიან გადაყვანილები.
ამ წუთებში, აჭარის მთავრობის ადმინისტრაციული შენობის მიმდებარე ტერიტორიაზე სიტუაცია კვლავ დაძაბულია. პოლიციასა და აქციის მონაწილეებს შორის სიტყვიერი დაპირისპირება მიმდინარეობს.
შეგახსენებთ, აჭარის მთავრობის სახლთან 24 საათიან რეჟიმში უკვე 40 დღეა გაერთიანებული ოპოზიციის აქცია მიმდინარეობს.
ავტორი: ნაირა ქობულაძე
