მესტიის ჩაკეტვის შემდეგ, ემუქრება თუ არა საკარანტინო ზომების გამკაცრება აჭარის რეგიონსაც?! – ამ საკითხთან დაკავშირებით, ინფექციონისტი ალექსანდრე გოგინავა აცხადებს, რომ აჭარა იმ შემთხვევაში ჩაიკეტება, თუ იქ ვირუსი მასიურად გავრცელდება. ამის შესახებ გოგინავამ „პრაიმტაიმნიუსთან“ საუბრისას განაცხადა.
„ამ ეტაპზე აჭარის ჩაკეტვის რისკები არ არის, თუმცა მომავალში ვნახოთ. იმ შემთხვევაში, თუ იქ ძალიან გავრცელდება დაავადება, შესაძლოა, დღის წესრიგში ამ რეგიონის ჩაკეტვის აუცილებლობა დადგეს. აჭარაში რამდენიმე შემთხვევის გავლენა არაფერს ნიშნავს, ასეთი შემთხვევები ჩვენ აქამდეც გვქონია.
ახლა აჭარაში ღრმა ეპიდემიოლოგიური კვლევები მიმდინარეობს, ის ადამიანები, რომლებსაც ინფიცირებულთან ჰქონდათ შეხება, კარანტინში გადადიან, ამიტომ დაავადების გავრცელება ნაკლებად ხდება“, – განაცხადა გოგინავამ.
კითხვაზე, არის თუ არა საქართველოს სხვა რეგიონებშიც კორონავირუსის გავრცელების მაღალი რისკი?! გოგინავა გვპასუხობს:
„ზოგადად, გავრცელების რისკი ყველგან არის, რადგან ეს ხომ გადამდები დაავადებაა, ამიტომ არის აუცილებელია დაიცვან ის რეკომენდაციები, რომლებსაც სპეციალისტები გასცემენ. ჩვენ უნდა ვიყოთ ფრთხილად, დავიცვათ რეკომენდაციები და პლუს, თუ რამე სიმპტომები გამოგვივლინდება, მივმართოთ შესაბამის სამედიცინო დაწესებულებას, რათა თავიდან ავიცილოთ დაავადების სწრაფი გავრცელება.
დიდი ალბათობით, შემოდგომაზე მასიურად ვირუსი არ გავრცელდება და ზაფხული გვექნება შედარებით მშვიდი. არამგონია, რომ უახლოეს სამ კვირაში და ერთ თვეში სიტუაცია რადიკალურად გაუარესდეს“,- განაცხადა გოგინავამ.
ინფორმაციისთვის, დღეს საქართველოში კორონავირუსის ხუთი ახალი შემთხვევა გამოვლინდა. ჯამში, ინფიცირებულთა რაოდენობა 1341-მდე გაიზარდა.
ავტორი: ეკატერინე ზარნაძე
