გონიოში ანდრია პირველწოდებულის ქუჩაზე მცხოვრები მოსახლეობის ნაწილი აქციას მართავს და 25 სართულიანი სასტუმრო კომპლექსის მშენებლობას აპროტესტებს. როგორც აქციის მონაწილეები აცხადებენ, გონიოში ყოფილი საავადმყოფოს მიმდებარე ტერიტორიაზე მიმდინარე მშენებლიბა უკანონოა და სამშენებლო კომპანიამ თაღლითური გზით დაირეგისტრირა აქ მცხოვრები ადამიანების კერძო საკუთრება.
„ვაპროტესტებთ იმას, რომ უკითხავად მოვიდნენ, სახლის კარებთან ბოძების ჩასმას აპირებენ. შესყიდული გვაქვსო ამბობენ. ეს მიწა ჩვენი საკუთრებაა და არაფერს არ გვეკითხებიან. დენის სადენები ჩაჭრეს, წყლის მილებიც. ზღვაზე გასასვლელსაც გვიკეტავენ. სახლში საიდან შევიდეთ. თან უჰაერობით დავიხრჩობით. საკუთარ ეზოს გვიღობავენ და ცხოვრების საშუალებას არ გვაძლევენ. თუ შეიძლება სიმბოლურ ფასად ამ მიწების გაყიდვა, ჩვენ ვიყიდდით“, – აცხადებენ აქციის მონაწილები.
გონიოში ანდრია პირველწოდებულის ქუჩაზე მიმდინარე მშენებლობას სამშენებლო კომპანია „ნექსტ გონიო“ აწარმოებს და 25 სართულიანი სასტუმროს მშენებლობაა დაგეგმილი.
„ეს არის სრულიად ქართული ინვესტიცია. სასტუმრო კომპლექსის ოპერირებას უზრუნველყოფს „ვინთემ გარდენი”. ინვესტუციის მოცულობა არის 10 მილიონ დოლარზე მეტი. ძირითადად დასაქმდება ადგილობრივი მოსახლეობა. შესაბამისად, მიზანიც და გეგმა არის, რომ ჩვენ ამ ინვესტიციით ხელი შევუწყოთ გონიოს განვითარებას. რაც შეეხება მოქალაქეთა პრეტენზიას, ამ ეტაპზე კომპანიას აქვს სრული ლეგიტიმური უფლება საკუთრების ფლობისა და მშენებლობის განხორციელების. თუ რამე პრეტენზია აქვთ მოქალაქეებს, შეუძლიათ მიმართონ სასამართლოს“, – აცხადებს სამშენებლო კომპანიის იურისტი გიორგი ხიმშიაშვილი.
მოქალაქეები ხელისუფლებას დახმარებას სთხოვენ.
ავტორი: ნაირა ქობულაძე
