გორში ბავშვების მოწამვლასთან დაკავშირებით დედათა და ბავშვთა სამედიცინო ცენტრი „იავნანა“ განცხადებას ავრცელებს.

როგორც გავრცელებულ განცხადებაში ვკითხულობთ, ცენტრს 3-4 ოქტომბერს ინტოქსიკაციის სიმპტომებით 48 პაციენტმა მიმართა.

„გორმედის“ ქსელის დედათა და ბავშვთა სამედიცინო ცენტრ ,,იავნანას“, 3-4 ოქტომბერს, ინტოქსიკაციის სიმპტომებით მომართა 48 პაციენტმა. პაციენტების ასაკი 1-დან 16 წლამდეა. აღნიშნული მოზარდებიდან 16 მოთავსდა სტაციონარში, დანარჩენ 32 ბავშვს კი გაეწია შესაბამისი მომსახურება და ყველა მათგანმა დატოვა კლინიკა. რაც შეეხება სტაციონარში მოთავსებულებს, არცერთი მათგანის მდგომარეობა მძიმე არ არის, ძირითადად, მსუბუქი და საშუალო სიმძიმისაა.

რაც შეეხება 5 ოქტომბერს, დღეს, 16 საათის მონაცემებით, ინტოქსიკაციის სიმპტომებით ,,იავნანას“ 18-მა პაციენტმა მომართა, მათგან მხოლოდ 1 მოთავსდა სტაციონარში, 17 მოზარდს კი გადაუდებელი დახმარების განყოფილებაში გაეწია  სამედიცინო მომსახურება, მათგან 12-მა კლინიკა უკვე დატოვა.

მთლიანობაში, დედათა და ბავშვთა სამედიცინო ცენტრ ,,იავნანას“ პედიატრიულ განყოფილებაში, 16 საათის მონაცემებით, ბაქტერიული გასტროენტერიტით მოთავსებულია 17 პაციენტი, ყველა მათგანის ჯანმრთელობის მდგომარეობა სტაბილურია“,- ნათქვამი გავრცელებულ განცხადებაში.

ცნობისთვის,  შეგახსენებთ, გუშინ გორში, სამედიცინო ცენტრ „იავნანაში“ მოწამვლის სიმპტომებით 50-მდე ბავშვი შეიყვანეს. ჯერჯერობით უცნობია, რა გახდა მოწამვლის მიზეზი.

ერთ-ერთი ვერსიით, ინტოქსიკაცია წყალს უნდა გამოეწვია, თუმცა დღეს ლაბორატორიული კვლევის შედეგები გახდა ცნობილი, სადაც ნათქვამია, რომ გორში სასმელი წყალი ნორმებს აკმაყოფილებს.