საქართველოში კორონავირუსი მთლიანი მოსახლეობის 1%-ზე ნაკლებმა გადაიტანა – მიიჩნევს ინფექციონისტი ალექსანდრე გოგინავა. როგორც მან „პრაიმტაიმნიუსთან“ ინტერვიუში განაცხადა, მასშტაბური კვლევა, რომელიც დაადგენს, რამდენმა ადამიანმა გადაიტანა კორონავირუსი, ბევრ საინტერესო კითხვას გასცემს პასუხს.
ალექსანდრე გოგინავა: რამდენ პროცენტს აქვს საქართველოში კორონავირუსი გადატანილი, ამის თქმა რთულია – იქედან გამომდინარე, რომ ჩვენთან ამ დაავადების მაღალი გავრცელება არ იყო, ვთვლი, რომ კორონავირუსი მოსახლეობის 1%-ზე ნაკლებს ექნება გადატანილი, მაჩვენებელი უფრო მაღალი არ იქნება. ეს ჩემი მოსაზრებაა და რეალურად, როგორი შედეგი იქნება, ამას კვლევა აჩვენებს.
-რატომ არის საჭირო დადგინდეს, რამდენმა ადამიანმა გადაიტანა კორონავირუსი?
-ქვეყნებში, სადაც საშუალება არსებობს, კვლევები ტარდება. ამ კვლევების ჩატარება საჭიროა, რათა ვიცოდეთ, რამდენმა ადამიანმა გადაიტანა კორონავირუსი, რამდენ ადამიანთან განვითარდა ანტისხეულები, რომლებიც კორონავირუსთან დაკავშირებით, დამცველობით ფუნქციას ასრულებენ. ასევე, შესაძლებელია, რომ კვლევის შედეგად გავიგოთ, რამდენ ხანს რჩება ანტისხეულები ადამიანის ორგანიზმში და რა ხანგრძლივობის იმუნიტეტი ყალიბდება კორონავირუსის გადატანის შემდეგ.
-როგორ შეაფასებთ ქვეყანაში არსებულ ეპიდსიტუაციას? -დღეს საქართველოში ვირუსის 7 ახალი შემთხვევა გამოვლინდა, თუმცა წინა დღეებში უფრო მაღალი მაჩვენებელი დაფიქსირდებოდა.
-ორ ათეულამდე ახალი შემთხვევების დაფიქრება ეპიდსიტუაციას რადიკალურად არ ცვლის. ამ ეტაპზე ჩვენთან კვლავ რჩება სტაბილური ეპიდემიოლოგიური სიტუაცია. თუ ქვეყანაში იქნებოდა ყოველდღიური მზარდი შემთხვევები, მაშინ შესაძლოა, გვეფიქრა, რომ სიტუაციის გამწვავება მოსალოდნელია. ჩვენ უახლოესი ერთი თვის განმავლობაში, შემოდგომამდე ეპიდემიოლოგიური სიტუაციის შენარჩუნებას მოვახერხებთ.
-ეპიდსიტუაციის მხრივ, რას უნდა ველოდოთ შემოდგომაზე?
-ეს ძალიან რთული კითხვაა – ამ კითხვაზე პასუხი, ალბათ, დედამიწის ზურგზე არავის აქვს. ეპიდსიტუაციის გამწვავება ან გაუმჯობესება დამოკიდებულია თავად ვირუსის ქცევაზე. ვირუსმა, შესაძლოა, ბუნება შეიცვალოს და უფრო აგრესიულ გახდეს ან პირიქით.
ასევე, რა იქნება შემოდგომაზე, ეს დამოკიდებულია, რამდენად სწრაფად გვექნება ეფექტური ვაქცინა, რომელიც მთავარი ბრძოლის იარაღია სწრაფად გავრცელებადი ინფექციების წინააღმდეგ. შემოდგომაზე თეორიულად შესაძლებელია, რომ ახალი შემთხვევების რაოდენობამ მოიმატოს, მაგრამ ვფიქრობ, რომ ჩვენს ქვეყანას აქვს რესურსი, რომ ვირუსის გავრცელება კონტროლირებადი იყოს.
ავტორი: ეკატერინე ზარნაძე
