ოპოზიციური პარტია „ათა-მეკენის“ წევრი დეპუტატის, კანიბეკ იმანალიევის განცხადებით, ყირგიზეთის პარლამენტმა ქვეყნის პრეზიდენტის, სოორნბაი ჟეენბეკოვის იმპიჩმენტის პროცედურა დაიწყო.
„დეპუტატების ნაწილმა იმპიჩმენტის მოთხოვნას ხელი მოაწერა.ძალიან რთული პროცედურაა, მაგრამ შეიძლება ითქვას, რომ იმპიჩმენტის პროცედურა დაწყებულია“, -განაცხადა დეპუტატმა.
შეგახსენებთ, რომ ბიშკეკში საპროტესტო აქცია 5 ოქტომბერს დღის მეორე ნახევარში დაიწყო. დემონსტრაციის მონაწილეები აპროტესტებენ არჩევნების შედეგებს, რომლის მიხედვითაც, 7 პროცენტიანი ბარიერის გადალახვა მხოლოდ პროსახელისუფლებო პარტიებმა შეძლეს.
აქციის მონაწილეები არჩევნების შედეგების გაუქმებასა და ხელახლა დანიშვნას მოითხოვენ. აქციის მონაწილეები გვიან ღამით პარლამენტის, პრეზიდენტის ადმინისტრაციისა და სახელმწიფო უსაფრთხოების შენობებში შეიჭრნენ.
ამასთან, ყირგიზეთის დედაქალაქში სახელმწიფო უსაფრთხოების კომიტეტის იზოლატორიდან გაათავისუფლლეს კორუფციის ბრალდებით დაკავებული ყირგიზეთის ყოფილი პრეზიდენტი ალმაზბეკ ატამბაევი. ატამბაევი ქვეყნის დედაქალაქში გამართული აქციის მონაწილეებსა და უწყების ხელმძღვანელობას შორის მოლაპარაკებების შემდეგ გამოიყვანეს შენობიდან.
ყირგიზეთის პრემიერ-მინისტრმა, კუბათბეკ ბორონოვმა ქვეყანაში მიმდინარე პროტესტებისა და არეულობების ფონზე თანამდებობა დატოვა. ყირგიზეთის პარლამენტის საგანგებო სხდომაზე ქვეყნის პრემიერ-მინისტრის მოვალეობის შემსრულებლად სადირ ჟაპაროვი დაამტკიცეს.
საპარლამენტო არჩევნები ყირგიზეთში კვირას გაიმართა. არჩევნებში სულ 16 პარტია მონაწილეობდა. 12-მა ოპოზიციურმა პარტიამ არჩევნების შედეგების აღიარებაზე უარი განაცხადა.
