„თუ აზერბაიჯანს ძალის ენა ურჩევნია, სომხეთის არმია,  მზად არის საკადრისი პასუხი გასცეს მტერს, რომელიც თავს დაესხა საზღვარს, ჩვენს მოქალაქეებს, ოჯახსა და სახლს“,- ამის შესახებ სომხეთის პრეზიდენტმა, არმენ სარქისიანმა განაცხადა. ინფორმაციას mediamax-ი ავრცელებს.

სომხეთის პრეზიდენტის თქმით, სომეხი სამხედროები  სიტუაციის კონტროლს განაგრძობენ.

„კორონავირუსის პანდემიის პირობებში, როცა სამყარო უფრო ჰუმანური გახდა, აზერბაიჯანი დაძაბულობის შექმნას ცდილობს“,- აღნიშნა მან.

შეგახსენებთ, აზერბაიჯანი-სომხეთის საზღვარზე სომეხ და აზერბაიჯანელ სამხედროებს შორის დაპირისპირება 12 ივლისს დაიწყო.

ცნობისთვის, ბაქოს და ერევანს წლებია კონფლიქტი აქვთ აზერბაიჯანის საერთაშორისოდ აღიარებული რეგიონის, მთიანი ყარაბაღის გარშემო. სომხეთის მიერ მხარდაჭერილმა სეპარატისტებმა აზერბაიჯანის ეს, ძირითადად სომხებით დასახლებული რეგიონი ადრეული 1990-იანი წლების ომით მოიპოვეს. ომს 30,000-მდე ადამიანი შეეწირა. კონფლიქტის გადაჭრის დიპლომატიურ მცდელობებს მნიშვნელოვანი პროგრესი არ მოჰყოლია.