შერიგებისა და სამოქალაქო თანასწორობის საკითხებში მინისტრის თეა ახვლედიანის განცხადებით, ზაზა გახელაძის გასათავისუფლებლად ქვეყანა მის ხელთ არსებულ ყველა მექანიზმს გამოიყენებს.
„გაიმართა სიღრმისეული მსჯელობა, სადაც ჩვენი კომპეტენციების მიხედვით წარმოვადგინეთ დღემდე განხორციელებული საქმიანობა, ინტენსიური ნაბიჯები, როგორც ჩვენს ხელთ არსებული ყველა ბერკეტის გამოყენებით, ასევე საერთაშორისო პარტნიორების ჩართულობით. ასევე ვიმსჯელეთ სამომავლო ნაბიჯებზე. ჩვენ უწყვეტ რეჟიმში ვმუშაობთ იმ მიზნით, რომ საქართველოს ყოველი უკანონოდ დაკავებული მოქალაქე, რომელიც დღესდღეობით იმყოფება უკანონო პატიმრობაში დაუყოვნებლივ და უპირობოდ იყვნენ გათავისუფლებული“, – აღნიშნა თეა ახვლედიანმა პრემიერ-მინისტრ გიორგი გახარიასთან გამართული შეხვედრის შემდეგ.
ზაზა გახელაძე საოკუპაციო რეჟიმის წარმომადგენლებმა გასული წლის 11 ივლისს დააკავეს.
